Plattdeutsch sprechen

De Kiärkencard Mannslüe

Vefasser: unbekannt

Bearbeit´t un üöwerset´t in´t Ölfske Platt: Ludger Besse

 

 

Bänd: Gueden Dagg Heine, Marijo, wi häfft us ja lang nich sahn. Wu geiht di´t, gifft wat Nie´s?

Heine: Ach, eegentlich nix. Ik sin gra´ up´n Wegg nao de Pastraut. Ik woll mi mine Kiärkencard affhalen.

 

B.: Kiärkencard, - wat is dat? Ansichtskarten kass du doch ouk bi BBS koupen.

H.: Wat is dat ? Wat is dat ? Häs du dann dao nao nix van ´häört? Et wett doch in´ne Kiärk un in Olfen van nix Anners men küert.

 

B.: Ja, - dat mag jawull sin, ik wass aower lestentiet nich so fak in Olfen, un ouk nich in´ne Kiärk. Et poss ümmers nich so. Ower vertell es, wat hät dat dann up sik met de Kiärkencart?

H.: Ja dat is so: Jedereen kann aff sofort nu de Kiäekencart beantragen. Daomet kanns du dann Punkte bineendriägen, so es in´ne Apthek´ orre bi Rewe.

 

B: Soouu, saowat gifft nu? .Dat is jao interressant. Un wu geiht dat so?

H.: Un diene Kollekte, we du Sundaggs in´t Küörfkenmdöüs, wenn du dann es in de Kiärk geihs, de kanns du nu faorts affbuchen laoten. Den Klingelbühl de gifft nu gar nich men. Mensch Bänd, mi dücht du wäörs owwer all heel lang nich men in´ne Kiärk.

 

B.: Dat is jao praktisch, dann gifft ja ouk kene Knöüp men in´n Klingelbühl. Un wu sall dat Ganze nu klappen?

H.: Also, dat Ganze is in Klassen un Farwen, indeelt.
De normale Kiärkencart is eenfach blous lila.

De Sülvercart kriss du, wenn du een Ährenamt häss. Tom Biespiël wenn du Messdeiner büss, orre wenn du bi de Prossion den Hiëmel dräggs.

De Goldcart kriss du, wenn du viël Ährenämter häs, un ümmers in de eerste Rieg´ steihs. De Fraulüe kriegt de

Goldcart wenn se tom Bispiël Bezirkshelferin sind, orre bi´n Leprabasar Kaffee inschütten dout.

Un dann giff dat noch de Platincart. Owwer de kriss du blous wenn du ´n Gëisliken orre ne Nunn´ in´ne Famillig häss.

 

B: Un nu sägg mi doch es waofüör dat Ganze guet sin sall.

H: Na, tou´t Punkte sammeln un bineenhalen natürlik. Also: Wenn du Kinner häss we Missdeiner sind, dann giff et Sonderpunkte. Owwer wenn de Kinner Sundaggs nich men in de Kiärk gaoht, dann giff dat Punktaffzüge.

Und dat Ganze fungsjoneert sou: Wen du in de Kiärk kümms an´t Wiehwaterbecken vörbi, dann trecks du dine Kiärkencart düör den Apparat un schwupptiwupp wess du met Wiehwater besprenkelt. Un je nao dem wat du vönne Card häss, is dat Water warm orre kaolt. Un wenn du de Platincart häss, dann rükt dat Wiehwater ouk naoch nao Pafüm.

B.: Dat häört sik jao spassig an, un wat giff dat süss noch?

H: Jao bi de Platincart häss du natürlik ümmer ´n reserveerten Platz in´ne erste Bank. Un et brengt di Een hen,

nao dienen Platz. Aff Goldcart gifft to´t sitten noch een weeket Küssen. Un bi de Kummion dao gifft aff Goldcart Hostie un Wien. Bi de Platincart, dao wett di dat Ganze ouk noch an dinen Platz bracht.

 

B.: Ja sägg es, mot ik dann met de Kiärkencart ümmer in Olfen in´ne Kiärk.

H:. Nee natürlik nich. Dat löppt Aals üöwern Computer. Dat gellt tom Biespiël ouk in Siäpro, orre Vinnum.

 

B.: Ja dann kann ik ja üöwerall Punkte bineenhalen. Owwer sägg es: Wu is dat dan met Bichten?

H: Dat is ganz eenfach: Met diene normale Cart kanns du normal bichten gaon. Aff Sülvercart genügt ne Bußandacht. Bi de Goldcart kriss du´n Bichtgespräch. Un bi de Platincart brüks du gar nix men bichten. Daomet is Al´s afdoon.

 

B.: Sägg äs, giff dat ouk sowatt wu ´ne Seniorencart? Ik mein so met Rabatt bi Pilgerfahrten tom Biespiël?

H.: So genau weet ik dat ouk nich. Dao moss du es in Mönster bi´n Bischopp naofraogen. De hätt jao alle dine Daten, wu fak du in´ne Miss´ wäös, orre bichten daon häss, un nao mähr.

 

B: Wat giff dat dann wenn du de vulle Punktetall bineenhalt häss?

H.: Ja dat is sou: Wenn du 6.000 Punkte bineen häs, dann kriss du de Kiärkenzeitung för ´n half Jaohr ümsüss. Un nao jede Miss draffs du affstimmen off du met de Priädigt inverstaohn wöäs. Bi de Goldcart kriss du Kopphöäres, dat du Als ouk richtig vestaohn kanns. In´n Winter sitz´ du met de Goldcart in´ne Näöcht van´ne Heizung. Ik sägg di dat: Du häss blous Vördeele met de Kiärkencart, blous Vördeele, besunners met de

Goldcart.

 

B.:Sägg es Heine kam´m denn ouhne Kiärkencart üöwerhaupt nao kiärklik hirauden?

H: Oh, dat is komplisseert. Dat mot beantragt wäern. Ik häw häört, de Antrag lägg owwer all in Rom bi´n Papst.

 

B.: Giff dat villicht ouk Probleme, wenn Se de Goldcart hät, un He blous de ömmelige Sülvercart?

H.: Jau, dat ganz bestimmt. Probleme gifft ouk mangs met de Famillig. Wenn nämlik din Brouer Pastor is, un He dann doch hieraot´, dann wet diene Cart faorts introcken, ouk dann, wenn et ne Platincart is. Sowat geiht gar nich.

 

B.:Nääi, dat is nich min Problem, min Brouer is ken Pastor. Owwer sägg es, wat willt de dann met de Kiärkencart

eegentlich ereeken?

H.:Na ja, ik sägg es sou: Man huopt, dat se sik alle vull Müh´ giëft, un so vull Punkte bineenhalt, dat se ´ne biätere Kiärkencart kriegt. Bi de Döüp krigg jede Kind per se siene eegene Kiärkencart. Wenn owwer de Vader orre de Moder all de Goldcart häfft, dann wet dat Wiehwater anwiärmt.

 

B.: Wat du alls wëis. Dat häff ik Aals garnich metkriëgen. Ik mot tougiëwen, ik was all längere Tiet nich men in´ne Kiärk. Dao kass es sahn, ouk in´ne Kiärk ännert sik de Tieten. Ik gao faorts nao´t Pfarrbüro un hal mi de Cart. Ik glöüw ik krieg all de Sülvercart. Ik sin ja bin Kolping vö de Stöühl toustännig, un bi de Fahrradbörse acht ik drup dat ümmers genoug Luft uppumpt is. Mens du dat nich ouk?

H: Jau, ganz bestimmt! Dann seih wi uss Sundag bit´t Kiärkencart – Düörtrecken un bi´t Punkte bineenhalen.

Büs daohen gued gaon.